انا الحزين

قاعد لوحدي وقلبي ساقية حزن سيالة

بغني

ما اعرف غني ولا عديد

زي افتكار الميتين في العيد



بعاني وحداني


صورتك قدامي مفرقاني

يا رب

ما تحببني في الناس تاني

ولا ترجعني اضحك تاني

ولا اعشق تاني


ولا دعا امي وهي بتصلي

يا رب كرهني في كل شئ طيب وانساني


قاعد في الشمس كلها غل

بستخبي منها تحت الضل

يا رب ما ترجعني اعشق خل

نشف في عروقي الود

واكتب بايدي تذكرة موتي

الا الظلم يا رب يعل


الا احزاني دي هي اكفاني

يا رب كرهني في كل شئ طيب وانساني


قربت من كتر الملل انسي الامل

يا اللي خلقت الناس من غير قلب

من غير حضن

خلقتهم مبحترموش حزن

مأساتي اني حزين

واحزاني من اللي ماهيش رفاهية

ودموعي من اللي ما هيش ماية

وضلوع عنيدة بتتكي بالجرح ع السكين


يا رب خلي جميع المعقولات تتلخبط

ولو يسألوني ساعة الجواب هستعبط

ولو استعبطو هعمل انا الاعبط

يا رب ارزقني بناس بيخافو من ضلي

ويقبلو الاقدام

ويهتفو بفضلي

م الرعب في الاحلام

ويخلدو ذكري

ع مدي الاعوام

ويهتفو باسمي

مع ان ذكره حرام

حتي انتي يا امي ولا انتي ام

في ام متعرفش ساعة الالم تضم

الانتحار اعلي قوايم الموت

الانتحار في الكدب

لما بخبي الصوت

الحزن اتقل من حجارة الصبر

والهم اوسع من فراغ القبر

وانا الحزين

الاغبي بين المتفرجين

ايه رايكو

لما احضن وانا قصدي اتحضن

لما يرحل صوتي خارج الزمن

ولا اشتريكو ولا تبعوني

ولا نور الصبح يخرق عيوني

في قلوبكم ادفنوني


واذكروني


اذكروني


وانتي برضو يا دنيا ولا انتي دنيا

في دنيا تطمع في الم

في دمع

في جرح


خلاص انا تعبت

خلاص انا بعت

بعت السنين الخرس

ورضيت بربع الربع خمس الخمس

في النوم اسرقي احلامي

وحققيها لغيري ادامي

ولا هتسمعي صوتي

ولا هشتكي ولا هبكي


هسكت لاني انا الحزين

الاغبي بين المتفرجين